Алматы облысында асыранды балаларды ұрып-соққан қамқоршыға қатысты тексеру жұмыстары басталды. Бұл туралы облыстық білім басқармасындағылар айтты. Ведомство мәліметінше, балалар қазір Ілеу ауданы, Түймебаев ауылында балалар үйіне орналастырылған. Балаларға қатыгездік жасалған іс бойынша материал Іле ауданының прокуратурасына және кәмелетке толмаған балалардың құқығы бойынша комиссияға жолданды. Балаларды одан әрі қамқорлыққа алу немесе одан айыру туралы шешімді арнайы құрылған комиссия қабылдайды.
Айта кетейік, бұған дейін әлеуметтік желілерде асыранды балаларды ер мен әйел ұрып-соғып, жұмысқа жекті деген видео тараған болатын. Кейіннен олардың ата-ана қамқорынсыз қалған балалардың асыраушысы екені белгілі болды. Бұл отбасы 4 баланы қамқорлығына алған екен.
Облыстық Полиция департаментінің мәліметінше, өгей балаларына күн көрсетпеген ата-анаға қатысты ӘҚБтК-нің 127-бабы бойынша іс сотқа жолданған.
