Елордада Қабанбай батыр даңғылындағы көпқабатты тұрғын үйдің 10-қабатынан бала құлап кетті. Оны сол маңнан өтіп бара жатқан 34 жастағы ер азамат байқап, қағып алған. Оқиға кешкі сағат 8-ден өте орын алған.
Қалалық Төтенше жағдайлар департаментіндегілер ер кісі баланы жерге қатты соғылудан сақтап қалды деп отыр.
«Биіктен құлаған бала 2017 жылы туған. 1988 жылғы азамат жолай өтіп бара жатып кездейсоқ көріп, дереу баланы қағып алуға тырысқан. Ол осылайша баланы жерге қатты соғылудан сақтап қалды. Бүлдіршін қазір №2 аурухананың жансақтау бөлімінде жатыр. Жағдайы ауыр», — деді ТЖД баспасөз қызметіндегілер.
5 жасар бүлдіршінді қағып алған ер кісі сол үйдің тұрғыны екен. Есімі — Талғат Әбдіханұлы. Төтеншеліктер ер кісін марапаттамақ болған, алайда ол бүлдіршіннің ауыр халде екенін айтып, марапаттан бас тартыпты.
