Павлодарда туыстар бір-бірінің үстінен арыз жазған. Оған жасөспірім мен туыс ағасы арасындағы жанжал себеп болған. Облыстық Полиция департаментінің мәліметінше, оқиға 29 шілде күні орын алған. Пасчаное ауылының кәмелет жасына толмаған тұрғыны 56 жастағы туысына дөрекі сөйлеп, тіл тигізген. Балағат сөзді көтере алмаған туысы ашуға булығып, інісіне қол жұмсапты. Жасөспірім алған жарақатынан соң медииналық көмекке жүгінген.
«Жанжалға қатысты екі адам да полицияға арыз түсірді. Аталған факт бойынша кәмелет жасына толмаған баланың ата-анасына қатысты Әкімшілік құқықбұзушылық туралы кодекстің 435-бабымен (Ұсақ бұзақылық) әкімшілік іс қозғалды. Ал туыс ағасына қатысты Әкімшілік құқықбұзушылық туралы кодекстің 73-2-бабы бойынша іс қозғалды. Материалдар шешім қабылдау үшін сотқа жіберілді» делінген ведомства мәліметінде.
