Елімізде 1 жасқа дейінгі баланың күтіміне байланысты берілетін жәрдемақының мерзімі ұзарып, 1,5 жасқа дейін төленуі мүмкін. Бұл туралы Орталық коммуникациялар қызметінде өткен брифингте әлеуметтік сақтандыру қорының бас директоры Нұрсұлу Кемел мәлімдеді.
«Біздің міндетіміз – бұл жүйенің тұрақтылығын, қаржылық орнықтылықты қамтамасыз ету. Әлеуметтік міндеттемелер ұзақмерзімді сипатты болуы керек. Мүгедектігі бар немесе біреудің қарауындағы адамдар мұндай төлемдерді ай сайын алады. Қазіргі таңда біз әлеуметтік кодекс аясында бала күтімі бойынша берілетін мемлекеттік жәрдемақы мерзімін 1 жылдан 1,5 жылға ұзартуды ұсынып отырмыз. Дегенмен дәл бұл жәрдемақыны тағайындау мерзімін ұзартуға қатысты нақты ештеңе айта алмаймын», – деді қор директоры.
Бүгінде елімізде 1 жасқа дейінгі бала күтіміне арналған төлемнің орташа мөлшері шамамен 41 мың теңге.
