Қазақстандық оқушылар енді жазғы каникулға екі апта кешігіп шығуы мүмкін. Тиісінше оқу маусымы ұзармақ.
Оқу-ағарту министрлігіне қарасты Мектепке дейінгі және орта білім беру комитетінің тиісті бұйрығы ашық талқыға шығарылды. Бұйрықтың түсіндірме жазбасында жоба «Білім туралы» заңның 5-бабы 14-тармақшасына сәйкес әзірленгені көрсетілген.
«Бұйрық жобасы орта білім беру ұйымдарында 2022-2023 оқу жылының басталуын, ұзақтығын және каникул кезеңін айқындайды.
Қосымша екі оқу аптасын қосу арқылы оқу жылының ұзақтығын ұлғайту бір күндегі сабақтар санын қысқартуға, бес күндік оқу аптасын іске асыруға, «күрделі» тақырыптарды зерделеу қарқындылығын төмендетуге, білім беру процесін дамыта оқыту қағидаттарында ұйымдастыруға мүмкіндік береді. Жазғы кезеңде каникул күндерінің санын қысқарту арқылы өткен оқу жылында білімнің бір бөлігін жоғалту тәуекелін, құқық бұзушылықтарды қысқарту, білім алушылардың шамадан тыс жұмыс істеу мен сырқаттанушылығын төмендету көзделіп отыр» делінген комитет бұйрығында.
