Қазақстандағы балабақшалар енді лицензиялаудан өтеді. Оқу-ағарту вице-министрі Шолпан Каринова мектепке дейінгі білім беру ұйымдарын лицензиялау кезең-кезеңімен жүргізілетінін атап өтті. Бұл туралы ол Facebook парақшасында жазды.
«Әлеуметтік желілерде балабақшаларды лицензиялау мәселесі белсенді талқылануда. Біреулер балабақшаларды тез арада лицензиялауды бастау керек деп жазуда, ал енді бірі мемлекет лицензиялауды енгізе отырып, мектепке дейінгі білім беруде жеке бизнестің дамуына кедергі келтіреді, лицензиялау жекеменшік балабақшалардың жабылуына әкеледі деп санайды. Егер балаларға қатысты зорлық-зомбылықтың жиі кездесетін жағдайларын ескере отырып, балалардың құқықтарын қорғауға келісуге болса және ол қажет болса, лицензиялауды енгізудің нақты себептеріне мүлдем сәйкес келмейтінін әділ атап өткен жөн. Мұны балалардың барлық ата-аналары және бүкіл қоғам түсінеді» деп жазды вице-министр.
Шолпан Каринова мемлекет лицензиялау арқылы балабақшаларды жаппай жабу көзделмейтінін алға тартып отыр. Лицензиялау мемлекеттік және жекеменшік балабақшаларға қатар жүргізіледі. Бұл арқылы мемлекет мектепке дейінгі ұйымдардың дамуына барлық жағдай жасайды.
«Лицензиялау кезең-кезеңмен жүзеге асырылады деп жоспарлануда. Алдымен заңдарға, басқа да заңға тәуелді актілерге өзгерістер енгізілетін болады. Бірінші кезеңде жаңадан ашылған мектепке дейінгі ұйымдар лицензиялаудан өтеді. Содан кейін лицензиялау қайта мемлекеттік аттестаттаудан өтпеген, жұмыс істеп тұрған ұйымдар үшін көзделген. Басқа барлық жұмыс істеп тұрған балабақшалар тәуекелдерді бағалау негізінде лицензия алатын болады» делінген жазбада.
Вице-министр балабақшаларды лицензиялаудың қажеттілігі не үшін туындап отырғанын да түсіндіріп берді.
«Қазір бұл процедураны қайтару қажеттілігі туындады. Өйткені балаларға қатысты көптеген резонанстық жағдайлар ата-аналар мен қоғамды әділеттілікті қамтамасыз ету үшін мемлекеттік органдарға жүгінуге мәжбүр етті. Бұл — қоғамның сұранысы. Бұл жағдайда лицензия дайындықты растау құралы ретінде балабақшаны ашу кезінде балалардың жағдайын тексеруге мүмкіндік береді» деп атап өтті ол.
