Ұлттық тестілеу орталығы шекті балл 1 пайызға көтеріліп, қазір 68 пайызды құрап отырғанын атап өтті. Тестілеу басталғаннан бері шамамен 220 мың рет тапсырылды. Түлектердің 75,8 пайызы қазақ тілінде, 24 пайызы орыс тілінде, 0,1 пайызы ағылшын тілінде тестілеуден өтті.
«Тестілеудің алтыншы аптасы аяқталды, бәрі қалыпты өтуде. Естеріңізге сала кетейін, негізгі Ұлттық бірыңғай тестілеуге қатысуға барлығы 290 мыңға жуық өтініш қабылданды, оның 160 мыңы бірінші, 130 мыңы екінші сынақ. Қазіргі уақытта оқушылар тестілеуден 220 мың рет өтті, яғни талапкерлер екінші мүмкіндікті пайдалана бастады. ҰБТ 5 шілдеде аяқталады», — деді Ұлттық тестілеу орталығының директоры Руслан Емелбаев.
267 талапкер смартфон, шпаргалка және басқа да тыйым салынған заттарды әкелгені үшін тестілеуге қатысу мүмкіндігінен айырылды. Тестілеу кезінде ережені бұзғаны үшін 262 адам аудиториядан шығарылды, олардың да нәтижелері жойылды.
ҰБТ-ға жіберу үш деңгейлі жүйе бойынша жүзеге асырылады: Face ID тұлғаны сәйкестендіру арқылы, жеке куәлік бойынша, сондай-ақ отырған орнында адамның жеке басын анықтау. Биылғы жылы тестілеу «1 компьютер – 2 камера – 1 тестілеуші» қағидасымен жүргізілуде. Егер бұрын тестілеу үдерісі әрбір компьютердің үстінде орналасқан бір ғана камера арқылы бақыланса, қазір адамды анықтауға және рұқсат етілмеген адамдардың кіруіне жол бермеуге мүмкіндік беретін екінші (алдыңғы) камера орнатылған.
Талапкерлердің, оның ішінде ерекше білім беру қажеттілігі бар талапкерлердің тестілеуден өтуіне қолайлы жағдай жасалуда. Олар үшін ҰБТ тапсыру уақыты тағы 40 минутқа ұзарады. Сонымен қатар сызбасыз және диаграммасыз сұрақтар әзірленді. Қабылданған шаралардың арқасында тестілеуге қатысатын ерекше білім беруді қажет ететін қатысушылардың саны артып келеді.
Талапкерлерге ыңғайлы болу үшін биыл алғаш рет ҰБТ-ның таңдалған күні, уақыты, орны және мамандандырылған пәндерін еске салатын SMS-хабарлама іске қосылды. SMS хабарлама ҰБТ қатысушыларының өздеріне, сондай-ақ кәмелетке толмаған талапкерлердің ата-аналарына немесе заңды өкілдеріне жіберіледі.
Академиялық адалдықты сақтау үшін талапкерлердің тест нұсқасы белгіленеді – әрбір ҰБТ қатысушысында тесттің жеке нұсқасы бар. Ереже бұзылған және тест тапсырмаларын аудиториядан тыс шығаруға әрекеттенген жағдайда Ұлттық тестілеу орталығы тәртіп бұзушыны анықтай алады, оның нәтижесі жойылады.
Ұлттық тестілеу орталығы талапкерлер тест тапсырғаннан кейін 30 минут ішінде апелляцияға бере алатынын еске салады. Апелляция бойынша шешім қабылданғаннан кейін сертификат тест тапсырушының жеке кабинетінде қолжетімді болады.
