32 жастағы азамат бөтеннің мүлкін жымқыру мақсатында үш тұрғын үйге заңсыз кіріп, жасырын түрде тұрмыстық заттары мен алтын бұйымдарын ұрлаған. Үй иелеріне жалпы құны 914 000 теңге сомасында шығын келтірген.
Аталған жайт бойынша үй иелері Қаратау ауданы Полиция басқармасына «102» арнасы арқылы арызданған.
Тәртіп сақшыларымен жүргізілген жедел-іздестіру шаралары барысында куәлерден жауап алынып, үйлерге жақын маңдағы бейнебақылау камералары мұқият қаралды.
Ұрлыққа қатысы бар азамат қала аумағынан ұсталды. Ол өзіне тағылған айыпты толығымен мойындап, материалдық жағдайын көтеру үшін ұрлық жасауды жоспарлап, осындай қадамға барғанын айтты. Сондай-ақ, ұрлаған заттарын арзан бағада сатып, ақшаны жеке бас пайдасына жаратқаны белгілі болды.
Күдікті тәртіп сақшыларын өз еркімен оқиға орын алған жерлерге ертіп барып, қылмыстық іс-әрекеттерін қалай жүзеге асырғанын және оқиғаның қалай басталып, өрбігенін баяндап берді.
Азамат ҚР ҚК-нің 188-бабының 3-бөлігінің 2,3-тармақтарында (Ұрлық) көзделген қылмыстарды жасағаны үшін кінәлі деп танылып, сот үкімімен 3 (үш) жыл мерзімге бас бостандығынан айырылды, деп хабарлайды Полиция департаментінің баспасөз қызметі.
Өз кезегінде полицейлер тұрғындарға мүмкіндігінше жеке үй-жайлардың терезелеріне темір тор, есіктерге сенімді құлып орнатып, бейнебақылау камераларымен жабдықтауды сұрайды.
