Атырау қаласы Полиция басқармасының патрульдік полиция қызметкерлері Бейбарыс даңғылының бойымен жол жүрісі қағидаларын өрескел бұзған “Lada Granta” маркалы автокөлігінің жүргізушісін тоқтатты. Ол мемлекеттік белгісі жоқ көлікті жүргізіп, маневр жасап, жаяу жүргіншілер жолымен жүріп, алдыңғы бүйір терезесін қараңғылатылған пленка жабыстырған күйде, үздіксіз қос ақ жолақты кесіп жолдың қарама- қарсы бөлігіне шыққан.
Жас жүргізуші өзінің іс-әрекетін інісін әскерден күтіп алған кезде жасағандығын айтып, өз кінәсін мойындаған.
19 жастағы азаматқа барлығы 131 709 теңге көлемінде айыппұл салынды.
Одан басқа жолдың жүру бөлiгiнiң қарсы бағытта жүруге арналған жағына, оның ішінде кері бұрылып немесе бұрылыс жасап шығу бойынша әкімшілік хаттам жасақталып, әкімшілік сотқа жолданды. Енді ол сот шешімімен алты ай мерзімге көлік құралын басқару құқығынан айырылуы мүмкін.
