Шымкенттегі қанағаттанарлық жолдардың үлесі алдағы жылдары 80 пайызға дейін артады. Бұл көрсеткішке қол жеткізу үшін көлік инфрақұрылымын дамытудың 2025 жылға дейінгі кешенді жоспары бекітілді. Құжатта барлығы 563 жобаны жүзеге асыру көзделген.
Кешенді жоспар аясында биыл қалада 348 шақырым жол жөнделсе, жыл соңына дейін 271 шақырымнан астам жол пайдалануға берілмек. Қалған жолдардың құрылысы келесі жылы жалғасады. 2022 жылдың соңына қарай тақтайдай тегіс жолдардың үлесі 67,4%-ға дейін өседі.
Жалпы, бүгінде қалада 187 жолда жөндеу жұмыстары жүргізілсе, оның 164-інде орташа жөндеу жұмыстары жүргізіліп жатыр. Атап айтқанда, Мангелдин, Тоқаев, Жолан батыр, Ақназар хан, Клара Цеткин, Республика, Рысқұлов, Иляев, Тәшенов, Дулати көшелерінде орташа жөндеу жұмыстары жүргізілуде. Осы он негізгі көшенің төртеуі жаңа, алтауы өткен жылғы өтпелі көше.
Өткен жылы орталық көшелерді жөндеп, қайта жаңғыртуға басымдық берілсе, биыл орамішілік көшелерге көңіл бөлінуде. Сондай-ақ биылғы жылы 122 шақырым жолға қиыршық тас төселеді.
Айта кетейік, Оңтүстік мегаполисте біз жолдардың сапасын қолға алдық. Биыл Көлік және жолаушылар тасымалы басқармасында магистральдық көшелер мен қала орталығындағы шалғай пункттерді қоса алғанда, 187 нысан мен 350 шақырымнан астам автожолды қалпына келтіруге уәде берілуде.
Ағымдағы жылы жол-көлік инфрақұрылымын дамыту бағыты бойынша 5 ауқымды нысан пайдалануға беріледі.
Атап айтқанда:
— Қонаев даңғылының жалғасын салу, 3 кезең бойынша құрылыс жұмыстары 2020 жылы басталды және ағымдағы жылдың шілде айының соңына дейін аяқталады деп жоспарлануда. Қазіргі уақытта жұмыстың 90% орындалды.
— Рысқұлов-Қонаев көшелерінің қиылысында жол айрығын салу бойынша жұмыстар жүргізілді, жұмыстардың 90% — ы аяқталды.
— Рысқұлов-Қонаев көшелерінің қиылысында жолаушылар өткелінің құрылысы бойынша жұмыстар 90% — ға аяқталды.
-А-2 Автомобиль жолының 2 кезеңі бойынша айналма жолдың құрылысы жүргізілді, жұмыстың 50% орындалды.
— Самал-1,2,3 шағынауданының магистральдық және қалаішілік көшелерінде 12,2 км жол салынады, олар жыл соңына дейін пайдалануға беріледі. Бүгінгі таңда жұмыстардың 95 пайызы іске асырылды.
38 мердігер ұйым жолдарды салумен және жөндеумен айналысады.
Естеріңізге сала кетейік, осы жылдың шілде айында ел Президенті Қасымжомарт Тоқаев жолдардың сапасына ерекше назар аударуды тапсырған болатын.
«Жолдардың сапасына ерекше назар аудару керек. Біздің елімізде жолдардың нашар екендігі және жол құрылысы саласындағы сыбайлас жемқорлық туралы ешкімге құпия емес. Егер басқасын айтпасақ, Ақордаға апаратын жол жамылған көрпе тәрізді», — деді Тоқаев.
Еліміздің транзиттік әлеуетін, оның ішінде «Қазавтожолдың» қызметін дамыту мәселесі жеке талқыланды. Мемлекет басшысы 2022 жылы 11 мың шақырымнан астам жолға жөндеу жұмыстары жүргізілетінін атап өтті. Бұл мақсатқа 600 миллиардтан астам теңге бөлінді.
