Жергілікті шаруалардың айтуынша, ауданның жері – шөлейтті, сондықтан жусан ғана өседі. Оны да құрт жесе, малымыз азықсыз қалатын болды деп алаңдайды Байғанин халқы. Зиянкестер ауданның Қопа, Ноғайты, Марғау жерлері мен көршілес Атырау облысының Сағыз бекеті аумағында жусанды жапырып жатыр. Қожалық иелері құртты өз күшімен улау мүмкін емес деп, әкімдіктен көмек сұрайды.
Облыстық ауыл шаруашылығы басқармасындағылар бұл жағдайдан хабардар. Басқарма басшысының орынбасары Асылхан Әбтиевтің айтуынша, жусанжегі Байғанин ауданының екі округінде 70 гектар жерге жайылып кеткен. Бұған ауа-райының жылы, әрі ылғалды болуы себеп деді маман. Ол қолданыстағы заңға сәйкес, жайылым жерлер жекенің қолында болса, шаруашылықтар құртты өз есебінен улауы тиіс деді.
