Түлкібас ауданы тұрғындарына бейтаныс жігіт өзін «жерсеріктік байланыс жүйесі» қызметкерімін деп таныстырған. Полицияның дерегінше, күдікті азамат ауданда жерсеріктік телеарналар орнатуға жаңадан тіркеу жұмыстарының жүріп жатқандығын айтып сендірген. Осылайша тұрғындардың жеке мәліметтерін жазып, бет-бейнелерін суретке түсіріп алған. Және осы арқылы арам ойын жүзеге асырып, қаржы ұйымдарынан жасырын түрде несие рәсімдепті.
«Келтірілген жалпы шығын көлемі 385 000 теңгеге жуық. Күдікті несие арқылы алған ақшаны өз пайдасына жаратып жіберген. Тексеру барысында ұсталған азаматтың бұрында алаяқтық жайты бойынша істі болғаны белгілі болды. Қазіргі таңда күдікті қамауға алынып, тергеу амалдары жүргізілуде», — деді Түркістан облысы ПД баспасөз хатшысы Гүлнәр Әбдірахманқызы.
