«Жолда қабылдау» акциясы «Ақтөбе-Атырау-Ресей» республикалық жолының 573-ші шақырымы, Қарабатан елді мекені маңындағы демалыс алаңында өткізілді. Мамандар ауыр жүк көліктерін тоқтатып, жүргізушілердің жол жүру құжаттары мен көліктің салмағын тексерді.
Атырау облысы Көлік бақылау инспекциясының бөлім басшысы Әнуар Бисалиевтің айтуынша, көктем мезгілінде ауыр жүк көліктерінің салмағына шектеулер қойылады. Мәселен, Атырау облысы 5-ші климаттық аймаққа жататындықтан, 1-наурыз бен 1-сәуір аралығында жүк көліктерінің салмағы 1 оське 8 тоннадан асырмау көзделген. Енді 1-сәуірден бастап бұл көрсеткіш 10 тоннадан аспау қажет. Ал, маусым айында ауа температурасы көтеріліп, асфальт қызған кезде 8 тоннадан асатын көліктердің күндіз жүруіне тыйым салынады.
Жыл басынан бері ірі көлемді жүктер мен ауыр салмақ бойынша 37 хаттама толтырылып, 6 млн. 300 мың теңге айыппұл салынған.
