Көліктегі полиция департаментінің қызметкерлері жедел іс-шараларын жүргізу барысында Алматы қаласынан Атырау қаласына дейін темір жол көлігімен есірткінің ірі партиясын тасымалдауды ұйымдастырған ер адам мен екі әйелді ұстады. Олардың барлығы бұған дейін әртүрлі баптар бойынша сотты болған. Атырау қаласының тұрғыны саналатын 49 жастағы ер адам ұйымдасқан қылмыстық топтың жетекшісі болып шықты.
Арнайы іс-шаралар барысында көлік полицейлері ірі көлемдегі есірткі затын тасымалдаушы мен оны алушыны ұстады.
Тәркіленген заттың жалпы салмағы 327 грамм болатын аса ірі мөлшердегі «гашиш» есірткі заты екендігі анықталды.
“Аталған факті бойынша Қылмыстық кодекстің 296-бабының 4-бөлігі бойынша сотқа дейінгі тергеу жүргізіліп, материал сотқа жіберілді” деп атап өтті Көліктегі полиция департаментіндегілер.
Ақтөбе облысы Мұғалжар аудандық сотының үкімімен қылмыстық топ мүшелері кінәлі деп танылды. Үшеуіне қатаң режимдегі колонияда 5 жылдан 6 жылға дейінгі мерзімге бас бостандығынан айыру жазасы тағайындалды.
