Алматыға бағыт алған жолаушы бойжеткен жұрттың мазасын алды. Көліктегі полиция департаментінің мәліметінше, ол ұшақ бортында темекі шеккен.
«Алматы қаласы әуежайындағы желілік полиция бөлімінің қызметкерлеріне «FlyArystan» әуекомпаниясының «Астана-Алматы» бағытындағы әуе рейсі ұшып келгеннен кейін акт бойынша бойынша жолаушы әйел берілді. Оқиға дүйсенбі күні болған. Көлік полицейлері тексеру барысында масаң күйінде әуе кемесінің бортында темекі шеккен Астананың 28 жастағы тұрғынын анықтады» делінген ведомство мәліметінде.
Медициналық куәландыру нәтижесі бойынша әйел кісі «жеңіл дәрежедегі» масаң күйде болған.
Тәртіп сақшылары құқықбұзушыға қатысты Әкімшілік құқықбұзушылық туралы кодекстің 440-бабының 1-бөлігі (алкогольдік ішімдіктер ішу немесе қоғамдық орындарда мас күйінде келу) және 441-бабының 1-2-бөлігі (әуе кемесінің бортында темекі бұйымдарын тұтыну) екі әкімшілік хаттама толтырды. Оған 55 айлық есептік көрсеткіш (168 465 тг) көлемінде айыппұл салынды.
