Маңғыстауда 38 жастағы ер кісі үш баласын жіпке асып өлтірген. Кейіннен өзі өмірімен қоштасқан. Жантүршігерлік оқиға, 11 желтоқсан күні болған. Кешкі сағат 19.45 шамасында Мұнайлы ауданының полиция бөліміне 4 мәйіттің табылғаны туралы хабарлама келіп түскен. Оқиға орнынан жедел-тергеу тобы жетті. Ер адамның алдымен 8 бен 4 жастағы және 10 айлық балаларын өлтіріп, кейін өзі асылып қалғаны анықталды.
«Тексеру барысында ер кісінің әйеліне жіберген аудиожазбасы анықталды. Ол жұбайына өлетінін және балаларын өзімен бірге алып кететінін айтқан. Бұл оқиға отбасылық жанжал негізінде орын алғандығы және ерлі-зайыптылардың ажырасқалы жатқандығы белгілі болды» делінген ІІМ Telegram-каналы таратқан мәліметте.
Ерлі-зайыптылардың екеуінің де тұрақты жұмыс орындары болған. Бұл дерек Қылмыстық кодекстің 99-бабы 2-бөлігі бойынша тіркелді.
