«Дикий Арман» лақап атымен танымал Арман Жұмагелдиевті тергеу изоляторында қамауда ұстау мерзімі 7 маусымға дейін ұзартылды. Бұл туралы Алматы қалалық соты хабарлады.
«Алматы қаласының мамандандырылған ауданаралық тергеу сотының 2023 жылғы 6 сәуірдегі хабарламасы бойынша сот қаулысымен тергеу органының өтініші қанағаттандырылды. Арман Жұмагелдиевке қатысты қылмыстық іс материалдарымен танысу кезеңінде қамау мерзімін 2 айға, яғни 2023 жылдың 7 маусымына дейін ұзартуға санкция берілді», – делінген ресми хабарламада.
Еске салсақ, қаңтарда Алматыдағы жаппай тәртіпсіздікке байланысты қалалық полицейлер қылмыс әлемінің серкесі Арман Жұмагелдиевті ұстаған болатын. Бас прокуратураның Арнайы прокурорлар қызметі құрамында «Дикий Арман» бар қылмыстық топқа жаппай тәртіпсіздік кезінде 24 адамды ұрлап, күштеп ұстаған деген айып тағылғанын айтты.
