Түркістан облысы Кентау қаласында 11 жасар оқушы қызды белгісіз ер адам соққыға жыққан. Оқиға 26 сәуір күні кешкі уақытта болған. Бұл туралы «Не молчи» қорының негізін қалаушы Дина Таңсәрі Instagram парақшасында жазды. Оның мәліметінше, үйінен дүкенге шыққан қызды ер кісі зорламақ болған. Оқушы айналасынан көмек сұрағанда тоқтаусыз соққыға жыққан. Алайда полиция бұл оқиғаны «Бұзақылық» бабымен тіркеген көрінеді.
«Қызға шабуыл жасаған ер адам оны зорламақ болған. Ал полиция бұл фактіні «Бұзақылық» бабымен тіркеген. Және оны босатып жіберген» деп жазды Дина Таңсәрі.
Әзірге Полиция департаментіндегілер бұл оқиға бойынша пікір білдірмеді. Ал облыстық денсаулық сақтау басқармасындағылар соққыға жығылған қыздың ауруханаға жедел жәрдем көлігімен жеткізілгенін айтты. Бас миының шайқалуы диагнозы қойылған науқас қазіргі таңда травматология бөлімінде ем қабылдауда. Жағдайы орташа ауырлықта.
