Шымкентте дәрігерлер жүкті әйел мен сәбиін аман алып қалды. Ішінде шаранасы бар науқасты аман алып қалу үшін медицина мамандары шұғыл түрде хирургиялық көмек көрсеткен.
Қалалық денсаулық сақтау басқармасының мәліметінше, 30 апталық жүктілігі бар әйел ауыр жағдайда жедел жәрдем көлігімен қалалық №3 аурухананың перзентхана бөлімшесіне жеткізілген. Науқаста бала жолдасының мезгілінен бұрын ажырау қаупі, геморрагиялық шоктың ауыр жағдайы анықталған.
Жүкті әйелдің жалпы жағдайын ескере отырып, дәрігерлер шұғыл түрде ота жасау туралы шешім қабылдады. Операция барысында науқастың гемодинамикалық көрсеткіштері тұрақсыз болып, жүрек соғысы тоқтап қалған. Дер кезінде көрсетілген реанимациялық шаралар нәтижесінде жүрек соғуы қалпына келтіріліп, ота сәтті аяқталды.
Бүгінгі таңда ана мен баланың жалпы жағдайы қанағаттанарлық. Дәрігерлердің бірлескен командалық жұмысының нәтижесінде ана мен баласының денсаулық жағдайы жақсарып, өз отбасына оралды.
