Түркістан облысында тау шыңынан құлап кеткен ер кісінің денесін іздестіру жұмыстары жалғасып жатыр.
Облыстық Төтенше жағдайлар департаментіне қарасты жедел-құтқару жасағының 8 құтқарушысы және Альпинизм федерациясынан 4 альпинист маманы іздеу жұмыстарына жіберілген.
Ауа-райының қолайсыздығы құтқару-іздестіру жұмыстарын қиындатып отыр екен. Өйткені тауда үздіксіз қар аралас жаңбыр, бұршақ жауған. Іздестіру аумағының бөліктері шамамен 70 градус бұрышты құрайтын биік шатқалдардан тұрады. Ал қар аралас жауын-шашын құтқарушылардың жоғары қарай көтерілуін қиындатуда.
Айта кетейік, 3 шілдеде Сайрам-Өгем ұлттық табиғи паркінің аумағында теңіз деңгейінен 4236 м биіктіктегі таудың басынан түсу кезінде 3 адамнан тұратын туристік топтың құрамындағы 1967 жылы дүниеге келген ер адамның арқаны үзіліп кеткен болатын. Салдарынан турист мұз үстімен домалап, еңіске қарай құлаған.
