Сыбайлас жемқорлыққа қарсы қызмет басшысы Асхат Жұмағалидің төрағалығымен а.ж. 1 тоқсанының қорытындысы бойынша жедел мәжіліс өтті. Жиында, өңірлердің халқын толғандыратын жүйелі проблемаларды шешу, алдын алу және профилактикалық жұмыс барысы талқыланды.
Мемлекеттік сатып алу мониторингі, бюджет қаражатын тиімді жұмсау, сондай-ақ «цифрлық теңге» арқылы «ақшаны бояуды» енгізу жөніндегі жұмыс жалғасатын болады.
Антикордық мәліметі бойынша, өткен кезеңде Сыбайлас жемқорлыққа қарсы қызмет органдарымен 69 талдау және мониторинг жүргізіліп, жемқорлық тәуекелдерін жою бойынша 565 ұсынымдар мен ұсыныстар енгізілген. Сондай-ақ, алдын алу шараларымен, оның ішінде жемқорлыққа қарсы еріктілермен 17 млрд теңгеден астам сома қаражатты негізсіз пайдалануға жол берілмеген.
Агенттік басшылығымен өңірлерде жемқорлық тәуекелдерінің картасын іске асыру, «Бизнеске жол» жобасы шеңберінде бизнес проблемаларын азайту, проблемалық, әлеуметтік маңызы бар объектілердің құрылысын мониторингілеу мәселелері бойынша тапсырмалар берілді.
Бұдан бөлек, ағымдағы жылы Сыбайлас жемқорлыққа қарсы қызмет 488 қылмыстық құқық бұзушылықты тіркеді. Сыбайлас жемқорлық жасауда 296 адам әшкереленді, оның 59-ы әртүрлі деңгейдегі басшылар. Аяқталған қылмыстық істер бойынша 188 млрд теңгеден астам шығын өтелді.
Агенттіктің барлық бөлімшелерінің жұмысында әлеуметтік қолдау, білім беру, денсаулық сақтау, тұрғын үй және жол құрылысы, инфрақұрылымды дамыту сияқты аса маңызды салалардағы жемқорлық көріністерін жою және жолын кесу маңызды болып қала береді.
Бұл ретте, ағымдағы күн тәртібін ескере отырып, Агенттік Төрағасы А. Жұмағали өңірлерде су тасқынына қарсы іс-шараларға бөлінетін бюджетті мониторингтеу қажеттігіне ерекше назар аударды. Қаражаттың мақсатты және тиімді бөлінуін қатаң бақылау міндеті бірінші орынға қойылды.
Орталық және өңірлік бөлімшелердің басшылары салдарларды жою кезінде бюджетті жымқыруға жол бермеуге, сондай-ақ мемлекеттік қолдау қаражатын бөлу кезінде кез келген теріс пайдалану мен айла-шарғы жасаудың жолын кесуге бағдарланған.
Сыбайлас жемқорлыққа қарсы қызмет басшысы азаматтарға келтірілген залалды өтеуге байланысты алаяқтық пен бопсалаудың ықтимал фактілері бойынша тұрғындардан өтініштер мен хабарламаларды тәулік бойы қабылдауды қамтамасыз етуді тапсырды.
