Мәжілістің жалпы отырысында «АMANAT» партиясы Фракциясының мүшесі Қайрат Балабиев, газ тапшылығына қатысты түйткілді мәселені көтерді. Оның айтуынша, көгілдір отын іздеп сабылып жүрген жұрт, бекет жағалап жүр. Осыған байланысты, Премьер-Министрдің бірінші орынбасары Роман Склярға газ баллондарын толтыру мәселесіне қатысты депутаттық сауал жолдады.
«Түркістан облысында табиғи газбен қамтылған елдімекендер саны 557-ге жетіп, қамту деңгейі 67 пайызды құрайды. Десе де, 300-ге жуық елдімекені осы күнге дейін газбен қамтылмаған. Яғни, жарты млн жұрт, көгілдір отынсыз күнін күнелтіп келеді. Үш айдан бері, газ тапшылығы орын алып, жұрт газ балондарын сақырлатып, бекет жағалап кетті. Осыған, автокөліктері тек газбен жүретіндерді қосыңыздар. Алайда, энергетика министрлігі мәселені шешуге асығар емес. Бір пысықайлар, 1000 теңге төлесе, бакпен балонын толтырып беруде. Ал 500 теңге қосымша төлесе, жартылай газ құйып беру, өз қалталарын пұлдауда»,-деді депутат.
Халық қалаулысы, көгілдір отын мәселесін шешіп, бұқараға қол ұшын беруді сұрады.
