Ағымдағы жылдың 8 қазанында Ғылым және жоғары білім министрінің бұйрығымен азаматтық алу немесе Қазақстан азаматтығын қалпына келтіру кезінде бірқатар талаптар бекітілді. Яғни, мемлекеттік тілді бастапқы деңгейде, Қазақстан Республикасы Конституциясының негіздерін және Қазақстан тарихын білетін жандар ғана, азаматтық алуға құқығы бар. Бұл бұйрыққа Ғылым және жоғары білім министрі қол қойды.
“Азаматтыққа қабылдау немесе Қазақстан Республикасының азаматтығын қалпына келтіру кезінде мемлекеттік тілді кемінде 36 балл, Қазақстан Республикасы Конституциясының негіздерін кемінде 9 балл, сондай-ақ Қазақстан тарихын кемінде 15 балл деңгейінде меңгергенін растау керек,” – делінген құжатта.
Айта кетейік, бұған дейін Қасым-Жомарт Тоқаев қазақ тілі мен тарихын білмей, Қазақстан азаматтығын алу мүмкін болмайтыны туралы заңға қол қойған еді.
