2025 жылғы 29 сәуірде Жамбыл облысы бойынша Мемлекеттік кірістер департаменті «Н және K» ЖШС-ге қатысты салықтық тексеру жүргізді.
Тексеру нәтижесі бойынша Қазақстан Республикасының мұнай өнімдері мен акцизделетін тауарлардың жекелеген түрлерінің өндірісі мен айналымын мемлекеттік реттеу саласындағы заңнамасын бұзғаны үшін әкімшілік құқық бұзушылықтар туралы хаттама толтырылған деп хабарлады ҚР Бас Прокуратурасы.
Алайда бұл бұзушылықтар тексеру нәтижелері туралы актісінде көрсетілмеген.
«Соттың 2025 жылғы 3 маусымдағы қаулысымен кәсіпкерлік субъектісі ӘҚБтК-нің 281-бабының 5-бөлігінің 5-тармағы бойынша әкімшілік құқық бұзушылық жасағаны үшін кінәлі деп танылып, 393 200 теңге мөлшерінде айыппұл салынған. Тараз қаласының прокуратурасы сот шешімімен келіспей, апелляциялық шағым түсірді. Жамбыл облыстық соты прокуратураның уәждерін ескеріп, салық органдары тарапынан жіберілген заң бұзушылықтарды көріп, кәсіпкердің жағына шықты»,-деп жазылған мәлімдемеде.
2025 жылғы 1 шілдеде апелляциялық сатының қаулысымен бірінші сатыдағы сот қаулысының күші жойылып, құқық бұзушылықтың болмауына байланысты әкімшілік іс жүргізу тоқтатылды, осылайша кәсіпкердің құқықтары қорғалды.
