Мемлекет басшысы осы қиын-қыстау кезде уақытша сынақтарды еңсеру үшін қоғамды біріктіріп, бірге күш жұмылдыруға шақырды. Осыған орай, медицина қызметкерлері құтқарушылармен және басқа да шұғыл қызметтермен қатар барлық мұқтаж жанға медициналық көмекке үздіксіз қол жеткізуді қамтамасыз ете отырып, күшейтілген режимде жұмыс істеуде.
«Осынау қиын кезеңде жергілікті төтенше жағдай жарияланған он өңірде 3 мыңға жуық медицина қызметкері өздерінің ең маңызды миссиясын – азаматтарымызға медициналық көмек көрсетуді және олардың денсаулығын сақтауды жалғастырып жатқанын ерекше атап өткім келеді. Су басқан аумақтарда 300-ге жуық жедел медициналық бригада жұмыс істеуде»,- деді Денсаулық сақтау министрі Ақмарал Әлназарова.
Төтенше жағдайларда медициналық ұйымдар тәулік бойы жұмыс істейді, әрбір науқасқа қажетті медициналық көмек көрсетіліп, дәрігерлер тарапынан қолдау көрсетіледі деп хабарлады ҚР ДСМ.
Табиғи апат айтып келмейтінін ескерсек, тұрғындардың көпшілігі күйзеліске түсіп, әбіржіп қалғаны рас. Өйткені, біреуі талай жылдық қара шаңырақтан айырылса, бірінің күнкөрісіне айналған малдары қырылып қалды. Сондықтан, аранйы психолог мамандарда кұшейтілген режимде жұмыс жасауда.
Сонымен қатар, санитарлық-гигиеналық және эпидемияға қарсы шаралар кешені жүргізілуде. Ол, үшін санитарлық-гигиеналық қызметтен 900-ге жуық маман жұмылдырылды.
Денсаулық сақтау министрлігі он өңірде халықтың денсаулығын сақтау мәселесін, оның ішінде дәрі-дәрмекпен және медициналық мақсаттағы бұйымдармен қамтамасыз ету мәселесін тұрақты бақылауда ұстап, жүкті әйелдердің, балалар мен қарттардың жағдайына ерекше назар аударуда.
