Төбелестен қаза болған Нұржан Сыдықтың апасының айтуынша, қазаға күдіктілердің арасында бесеуі мұғалімнің баласы.
“Бір ата-ана баласын ертіп, кешірім сұрап келді. Ол “мен де ұрдым” деп кешірім сұрады. Кінәлі тек 2 бала емес. Жоғары сыныпта оқитын 5-6 бала ұрған. Ішінде бесеуі мұғалімнің баласы. Нағашы ағасы аудандық полиция бөлімінде істейтін бала бостандықта жүр. Қасында болған балалардың бәрі соның ұрғанын айтып отыр”, – деді марқұмның апасы.
Осы оқиғадан соң, Ақтөбе облысының білім басқармасы жұмыс тобын құрған.
“Олар Қопа ауылына барып қайтты. Облыстағы мектептерде буллинг пен агрессияға қарсы жұмыс күшейтіледі”,-деді білім басқармасының басшысы Жайық Сұлтан.
Қопа ауылдық мектебі директоры өз еркімен жұмыстан шықты. 18 оқушыдан жауап алынып, 2 адам күдікті ретінде қамауға алынды.
Естеріңізде болса, 2 қыркүйек күні оқушылар арасында төбелес орын алып, 9 сынып оқитын жасөспірім көз жұмғанын айтқан болатынбыз.
