Ақтау қалалық соты қайыр сұраумен байланысты қылмыстық әрекеттер бойынша үкім шығарды. ҚР Қылмыстық кодексінің 126-бабы («Бас бостандығынан заңсыз айыру») және 128-бабы («Адамды қанау») бойынша ауыр қылмыс жасаған үш адам бас бостандығынан айырылды.
Тергеу материалдарына сәйкес, 2023 жылдың қазан айынан 2024 жылдың наурызына дейінгі аралықта сотталғандар Ақтау қаласында мүгедектігі бар екі азаматты еркінен тыс ұстап, оларды пайда табу мақсатында қайыр сұрауға мәжбүрлеген.
Аяқсыз екі жәбірленуші алғашында Қарағанды қаласынан алдап әкелініп, Семей қаласында қайыр сұрауға мәжбүр болған. Кейін оларды Ақтауға жеткізіп, жергілікті базарларда қайыр сұратқан. Түскен қаражатты сотталғандар өз пайдаларына алып отырған.
Жәбірленушілерге жүйелі түрде психологиялық және физикалық қысым көрсетілген, қашуға әрекеттенген кезде қорқыту мен күш көрсету фактілері де тіркелді. Тек 2024 жылдың наурыз айында жәбірленушілердің бірі полицияға хабарласа алған. Осы мәлімет қылмыстық топтың әшкереленуіне себеп болды.
Сотталғандар – 50 жастағы әйел және оның екі ұлы. Олар «отбасылық бизнеске» айналдырған бұл заңсыз әрекеттері үшін әрқайсысы 7 жыл мерзімге бас бостандығынан айырылды.
Облыстың құқық қорғау органдары адам саудасына және еңбек қанауына қатысты құқықбұзушылықтардың алдын алу және жолын кесу бойынша жұмыстарды жалғастыруда.
Маңғыстау облысы прокуратурасы тұрғындарды адам саудасына немесе заңсыз еркінен айыруға байланысты фактілер туралы 8 (747) 139-18-39 сенім телефонына хабарлауға шақырады.
