“STOP-трафик” операциясы барысында полицейлер адам саудасымен, адамдарды, оның ішінде кәмелетке толмағандарды жезөкшелікпен айналысуға тартумен, притондар ұстаумен және жеңгетайлықпен байланысты 40 қылмысты анықтады. Сондай-ақ жезөкшелікпен айналысуға арналған үй-жайлар ұсыну бойынша 156 және қоғамдық орындарда адамдарды мазалау бойынша 640 әкімшілік құқық бұзушылық тіркеді деп хабарлады ІІМ.
«Жамбыл облысында зауыттардың бірінің аумағында көші-қон заңнамасын бұза отырып (еңбек шарттары, визалар (С-3 нысаны) және Қазақстанға келгені туралы хабарламалар болмаған), еңбек қызметін жүзеге асырған шетелдік азаматтар анықталып, полицияға жеткізілді. Осыған ұқсас дерек Солтүстік Қазақстан облысында анықталды, онда құрылыс объектілердің бірінің аумағында көші-қон заңнамасын бұзған 14 шетелдік азамат еңбек қызметін жүзеге асырған. Ал, Шымкент қаласының полицейлері, төрт адамнан тұратын топты ұстады. Олар ұзақ уақыт бойы 18 бен 23 жас аралығындағы қала тұрғындарын жалдамалы пәтерлерде жезөкшелікпен айналысуға тартқан. Күдіктілер жәбірленушілерді интимдік фотосуреттермен бопсалап отырған.Түркістан облысында облыс прокуратурасының үйлестіруімен Қызылорда облысының 2007 ж.т. және 2006 ж.т. екі тұрғыны ұсталды. Олар Telegram әлеуметтік желісінің жабық топтарында кәмелетке толмағандардың қатысуымен порнографиялық бейнежазбаларды сатумен айналысқан»,-деп жазылған мәлімдемеде.
Сонымен қатар, Қарағанды облысында 60 жастағы ер адам ұсталды. Ол ақшалай сыйақы үшін жас қыздардың аналарымен оларға қатысты жыныстық сипаттағы азғындық әрекеттерді одан әрі жасау және балалар порнографиясын жазу мақсатында келісімдер жасаған.
Күдіктілер, уақытша қамау изоляторына жабылды.
