ҚР Туризм және спорт министрлігінің мәліметі бойынша өткен аптада Лахор қаласында өткен Азия чемпионатында спортшыларымыз аралас жекпе-жектен 7 алтын иеленген. Сонымен қатар, каратэден Филиппин астанасы Манилада өткен жарыста жерлестеріміз 4 алтынды еншілеген. Айта кету керек, басқа да спорт түрлерінен еліміздің азаматтары жүлдемен оралған.
Нақтырақ айтар болсақ:
Шахмат: Бибісара Асаубаева Грузия астанасы Тбилисидегі Гран-при кезеңінде 5,5 ұпай жинап, күміс жүлдеге қол жеткізді. Ол соңғы турда Вейшали Рамешбабумен (Үндістан) тең түсті.
Байдарка мен каноэде есу: Өзбекстанның Самарқанд қаласында өткен әлем чемпионатында каноэде 500 метрге ескек есуде отандасымыз Мария Бровкова мәреге үшінші келіп, қола медаль жеңіп алды. Оның уақыт көрсеткіші – 2:09.731 секунд.
Велоспорт: Тректегі велоспорттан жасөспірімдер арасындағы әлем чемпионатында (Қытай) қазақстандық велоспортшы Данияр Шаяхметов күміс медаль иеленді. Велошабандоз кейрин бағдарламасында сынға түсті.
Күрес: Амманда (Иордания) өткен күрес түрлерінен 17 жасқа дейінгілер арасындағы әлем чемпионатында қазақстандық палуандар 3 күміс, 4 қола медаль жеңіп алды.
Каратэ: Филиппин астанасы Манилада мәресіне жеткен WKF каратэден жасөспірімдер мен жастар арасындағы Азия чемпионатында жерлестеріміз 4 алтын, 6 күміс, 4 қола медаль олжалап, жалпыкомандалық есепте үздік үштіктен көрінді.
Самбо: Қырғызстанның Шолпан-ата қаласында өткен самбодан Әлем кубогінде Қазақстан құрамасының спортшылары 2 алтын, 5 күміс, 10 қола медаль еншіледі.
Футзал: Қазақстан құрамасы Өзбекстанда өтетін әлем чемпионаты қарсаңында елордада Тәжікстан футзалшыларымен екі мәрте жолдастық кездесу өткізіп, екеуінде де жеңіске жетті. Алғашқы матч 3:0 есебімен, екінші ойын 4:3 есебімен Қазақстан құрамасының пайдасына аяқталды.
Аралас жекпе-жек: Пәкістанның Лахор қаласында ұйымдастырылған Азия чемпионатында отандастарымыз 7 алтын, 9 күміс және 10 қола жүлдеге ие болды.
