Астанада шетелдік азаматша жергілікті тұрғынды гипноздап, ақшасын алып кеткен. Полицияға шағымданған жәбірленушінің айтуынша, ол тапа-тал түсте алданып қалған.
Есіл ауданының криминалдық полиция қызметкерлері іздестіру іс-шараларын жүргізу барысында күдікті ретінде алаяқ әйел анықталды. Ол Өзбекстан Республикасының 26 жастағы азаматшасы болып шықты және оның жүктіліктің жетінші айында екені белгілі болды. Алданған келіншек күндіз Тұран даңғылының бойымен келе жатқанда оған бейтаныс әйел жақындап, онымен сөйлесе бастағанын айтқан. Көз тиген деген сылтаумен ол тазартуды ұсынған. Содан кейін тазару жорасын жүргізген болып, алаяқтық жолмен 105 мың теңге көлемінде ақшасын иемденген. Бірақ көп ұзамай жүкті әйелдің алаяқ екенін түсінген елордалық дереу полицияға шағымданыпты.
Алаяқтық фактісіне қатысты ҚР ҚК-нің 190-бабы (Алаяқтық) бойынша сотқа дейінгі тергеу амалдары басталды. Күдіктіге қатысты ешқайда кетпеу туралы қолхат түріндегі бұлтартпау шарасы қолданылды. Оның қазіргі уақытта елорда аумағында бұрын жасалған осыған ұқсас қылмыстарға қатысы бар-жоғы анықталып жатыр» делінген полиция мәліметінде.
