Қазақстан азаматтары енді сенім хаттарды нотарусқа бармай-ақ үйінде отырып рәсімдей алады. Бұл туралы Цифрлық даму, инновациялар және аэроғарыш өнеркәсібі министрі Бағдат Мусин Facebook парақшасында жазды.
«Бүгін Әділет министрі Азамат Несіпбайұлымен жаңа сервис – Цифрлық нотариаттың таныстырылымын өткіздік. Ол eGovMobile ұялы қосымшасы арқылы нотариалды түрде куәландырылатын сенімхаттарды онлайн форматқа ауыстыруға мүмкіндік береді. Оны шетелде жүрген азаматтар да пайдалана алады. Ол үшін қосымшаға кіріп, нотариусқа бейнеқоңырау шалу жеткілікті» делінген жазбада.
Мұндай сенімхат «Цифрлық құжаттар» сервисінде қолжетімді және оны талап ету орнына ұсынуға болады.
Бұл ретте, аталған жоба Мемлекет басшысының тапсырмасы бойынша, Үкіметтің «цифрлық» бастамалары аясында әзірленгенін атап өту керек. Министрдің мәліметінше, болашақта мұндай қызмет екінші деңгейлі банктердің қосымшаларында да пайда болады.
