Алматыдағы №2 балалар клиникалық ауруханасында саусағы екіге бөлінген 9 жасар балаға күрделі ота жасалды. Дәрігерлердің айтуынша, бұл реплантанция операциясы Қазақстан бойынша алғаш рет жасалып отыр. Және де мұндай күрделі отаны елімізде санаулы ғана дәрігерлер жасай алады екен.
Медицина мекемесіндегілердің айтуынша, мектеп оқушысының көшеде алған жарақатынан сол қолының бесінші саусағы екіге бөлініп қалған. Дәрігерлер саусақты қайта жалғаған. Операция 5 сағатқа созылған. Ақ халаттылар саусақты сақтап қалу үшін тін мен тамырларды операциялық микроскоппен тігіп, зақымдалған саусақтың артерияларын, өте кішкентай диаметрлі жүйке талшықтарын біріктірген. Осылайша жалғанған саусақта сүйектен басқа сіңірлер, тамырлар және қан айналымы қалпына келтірілді. Жалғанған саусақ толығымен тамыр алып, қалыпты жағдайда жұмыс істеп тұр.
Науқас бала клиникалық ауруханада 8 күн стационарлық ем қабылдаған.
