Қазақстанда 1 млн-ға жуық адамның алатын жалақысы төмен. Бұл туралы Үкімет үйінде өтіп жатқан еліміздің әлеуметтік-экономикалық дамуы жөніндегі кеңесте белгілі болды. Премьер-министр орынбасары Алтай Көлгінов өз сөзінде биыл жәрдемақылар қалай, қаншаға өсетінін мәлімдеді.
«Жыл басынан бері мүгедектігі бар және асыраушысынан айырылған 900 мыңға жуық адам алатын әлеуметтік жәрдемақы мөлшері 8,5% өсті. Ал бірінші шілдеден бастап бұл төлемдер тағы 14,5% өседі. Сонда биыл жылдық өсім 23% болады», – деді вице-премьер.
Өткен жылы атаулы әлеуметтік көмек алушылардың саны 800 мыңға жуықтаса, осы жылдың бірінші тоқсанында олардың саны 446 мыңды құраған. Негізгі бөлігі аз қамтылған отбасылар. Демек Алтай Көлгіновтың сөзіне сенсек, елімізде 1 млн-ға жуық адам төмен жалақы алады.
Ал жыл басынан бері 1 млн 200 мың адамның айлығы 30% өскен.
«Бірінші қыркүйектен бастап 380 мыңнан астам студенттің шәкіртақысы 20% , колледждерде 50% артады. Мемлекеттік қолдаудың әлеуметтік шаралары 4 400 мың қазақстандыққа әсер етті», – деді Алтай Көлгінов.
