Антикоррупциялық қызмет Кентау қаласының бұрынғы әкіміне қатысты тергеуді аяқтады. Бұл туралы ведомствоның баспасөз қызметі хабарлады.
«2013 жылы ол Премьер-министр кеңсесінің қызметкері бола отырып, ірі жеке меншік компаниясының меншік иесін жауапты лауазымды тұлғаларға аса ірі сомада пара беруге көндірген. Осы үшін құрылыс бойынша тендерде жеңісті қамтамасыз етуге уәде берген. Талап етілген соманы алып, өзіне қалдырып, ақшасының бір бөлігін Астана қаласынан жаңа үй, қымбат тұратын автокөлік және бірнеше жүк техникасын сатып алуға жұмсаған» делінген мәліметте.
Оның әрекеттері аса ірі көлемде пара беруге арандату және алаяқтық ретінде сараланған. Тергеу сотының санкциясымен күдікті қамауда отыр.
Қазіргі уақытта қылмыстық іс материалдары қабылданған шешімнің заңдылығын тексеру және одан әрі сотқа жолдау үшін Астана қаласының прокуратурасына тапсырылды.
