Қостанай облысы Федоров ауданында осыдан 33 жыл бұрын әйел кісіні өлтіру фактісі болған. Полицейлер қылмыстың «ізін суытпай» аша алмаған және іс архивке өткізілген. Ал былтыр, яғни 32 жылдан кейін аудан полициясы кісі өлтірушіні анықтау және тергеуді аяқтау туралы баяндаған. Олардың мәліметінше, «Ж» деген тұрғын кінәлі деп танылған. Ол өз кінәсін мойындады деп көрсетілген. Бірақ прокуратура анықтағандай, күдікті кінәлі деп танылғаннан 5 жыл бұрын қайтыс болған.
Бас прокуратураныңы хабарлауынша, ол кінәсін мойындау туралы ешқайда жазбаған және қылмыс жасаудағы кінәсі қылмыстық іс материалдарымен дәлелденбеген.
Полиция қызметкерлері қылмыстың ашылу көрсеткіштерін жасанды түрде арттыру мақсатында қылмыстық заңнаманың негізгі қағидаттарын бұзған.
Прокуратура марқұм боп кеткен күдіктіні кінәлі деп тану туралы барлық процестік шешімдердің күшін жойды. Тергеп-тексеруді ұйымдастыру басқа органға жүктелді.
«Кінәлі қызметкерлерге қатысты жауапкершілікке тарту туралы мәселе көтерілді. Осы мән-жайларды анықтау үшін Бас прокуратура қызметкерлеріне өңірге барудың қажеттілігі туындамады. Электрондық форматтағы іс ақпараттық жүйелер арқылы онлайн-режимде зерделенді» делінген Бас прокуратура мәліметінде.
