ҚР Премьер-Министрінің орынбасары Ералы Тоғжанов “адами капитал – жаңа Қазақстанның дамуының негізгі ресурсы”ғылым және жоғары білім форумының пленарлық отырысына қатысты.
“Мемлекет басшысының тапсырмасына сәйкес білім және ғылым министрлігі екі ведомствоға бөлінген. Бұл шараның негізгі мақсаты ғылыми қызметті үйлестіруді күшейту және ғылым және жоғары білім беру ұйымдарының жұмысын жетілдіру, сондай-ақ салаларды дамытудың стратегиялық бағдарламаларымен және экономиканың қажеттілігімен байланыстыра отырып, барлық ғылыми — техникалық бағдарламалар мен зерттеулерді қалыптастыру мен іске асыруды үйлестіру болып табылады”, – деді Ералы Тоғжанов.
Ол сондай-ақ Мемлекет басшысы салалық мемлекеттік органдардың ғылыми мекемелері мен жоғары оқу орындарын ғылым және жоғары білім министрлігінің қарамағына кезең-кезеңімен беру мәселесін қарауды тапсырғанын айтты. Бұл ғылым саласында бірыңғай мемлекеттік саясатты қалыптастыру үшін қажет.
ҚР Премьер-Министрінің орынбасары Ералы Тоғжанов салалық мемлекеттік органдарға, ҒЗИ мен жоғары оқу орындарына бірқатар тапсырмалар берді. Атап айтқанда, салалық жоғары оқу орындары мен ҒЗИ директорлар Кеңесінде хұқ өкілдерінің үлесін ұлғайту, ЖОО және ҒЗИ басшыларының кандидатурасын ХҰҚК-мен міндетті түрде келісу, ел ғалымдары үшін ҒЗИ мен ЖОО-ның зертханалық және ғылыми базасына бірыңғай қолжетімділікті қамтамасыз ету, сондай-ақ іске асырылып жатқан жобалардың тиімділігіне ғылыми ұйымдардың міндетті аудитін жүргізу.
“Ғылыми әзірлемелерді толыққанды коммерцияландыру үшін тек ғылыми зерттеулер үшін ғана емес, сонымен қатар тәжірибелік-конструкторлық және технологиялық жұмыстарды жүргізу үшін инфрақұрылымды, сондай-ақ тұтастай алғанда инновациялық экожүйені дамыту қажет. Бұл технологиялық инкубаторлар, технопарктер, акселераторлар, венчурлік қорлар”,-деп атап өтті Премьер-Министрдің орынбасары.
Ералы Тоғжанов кадрларды даярлау жүйесі озық кадрлармен қамтамасыз ету моделіне көшуі тиіс екенін атап өтті.
“Кадрларды озық даярлау моделіне көшу білім беру бағдарламаларын әзірлеу критерийі мен талаптарын түбегейлі өзгертеді. Бұл жұмыс “Мамандығым-болашағым” халықтың табысын арттыру бағдарламасының негізін қалады. Мұндай шешімді барлық өңірлер мен салаларға масштабтау қажет. Біз мұны қолдаймыз және бұл шараны 2026 жылға дейінгі білім беруді дамыту тұжырымдамасында қарастырған жөн деп санаймыз”, — деді Ералы Тоғжанов.
Сондай-ақ, ҚР Премьер-Министрінің орынбасары халықаралық сарапшылардың бағалауы бойынша қазіргі заманғы 4 — деңгейдегі өнеркәсіпті дамыту сапалы адами капиталға, 16% — инфрақұрылымға және тек 12% – шикізатқа байланысты екенін атап өтті. Сондықтан дамыған ақпараттық технологиялар дәуірінде бәсекеге қабілетті мамандарды тәрбиелеу қажет.
