Ақмола облысы Астрахан ауданында жүк көлігі мен «Газель» соқтығысты. Оқиға бүгін, 29 қарашада Жалтыр ауылының маңында болған. Жол апаты туралы куәгерлер полицияға хабарлаған.
Алдын ала мәліметтерге сәйкес, “Екатеринбург-Алматы” автожолының 1105 шақырымында “Газель” маркалы автокөліктің жүргізушісі рөлді басқара алмай, қарсы қозғалыс жолағына шығып кеткен. Қостанай облысының 29 жастағы тұрғыны 52 жастағы ер кісінің басқаруындағы “Маз” маркалы автокөлікпен соқтығысқан. Соқтығысу салдарынан “Газель” кюветке құлап кетіп, жүргізушісі оқиға орнында көз жұмды. “Маз” маркалы автокөліктің жүргізушісі мен жолаушысы Астрахан аудандық ауруханасына жеткізілді.
Полиция департаментінің мәліметінше, Қылмыстық кодекстің 345-бабы 3-бөлігі бойынша сотқа дейінгі тергеу жүргізілуде. Тиісті сараптамалар тағайындалды.
