Шымкентте үш жеңіл көлік соғысып қалды. Жол апаты кеше кешкі сағат 19:15 шамасында “Шымсити” шағынауданында болған.
Белгілі болғандай, Mercedes Benz автокөлігінің жүргізушісі атауы жоқ көше қиылысында екінші дәрежелі жолда бола тұра, басты жолда келе жатқан Toyota Camry және Opel Vectra көліктеріне соқтығысқан. Салдарынан әртүрлі дене жарақатымен 3 жүргізуші және 4 жолаушы ауруханаға жеткізілді.
Полиция хабарлауынша, адам шығыны жоқ. Mercedes Benz көлігі толықтай өртеніп кеткен. Қалған екі автокөлікке материалдық шығын келтірілді.
Полиция қызметкерлері аталған жайтқа қатысты ҚР ӘҚБтК-нің 610-бабы (Көлік құралдары жүргізкшілерінің жол жүрісі қағидаларын адам денсаулығына зиян келтіруге алып келген бұзушылығы) бойынша әкімшілік хаттама толтырды. Алдағы уақытта жинақталған іс-құжаттар сотқа жолданады.
