Шымкентте қонақ үйдің алдына скутерін қойған тұрғын жарты сағаттан кейін қайтып келгенде көлігінің ұрланғанын білген. Ол бұл туралы бірден полицияға хабарлаған.
Тәртіп сақшылары арызды «Ұрлық» бабы бойынша тіркеп, іздеу шараларына кірісті. Сыртқы бейнебақылау камераларының жазбасын тексеру кезінде скутерді жас жігіт ұрлап кеткені анықталды. Көшедегі бейнекамералары арқылы жедел уәкілдер оның ізіне түсіп, нәтижесінде күдікті тұрғылықты мекенжайында ұсталды.
Белгілі болғандай, скутердің қасынан өтіп бара жатқан жігіт оталдырғыштағы кілтті байқап қалып, рөлге отырып үйіне қарай бет алған. Ол үйінің қақпасына жақындай бергенде жолдың шұңқырына түсіп, ұрланған скутермен бірге жерге құлаған. Алайда кішігірім апат ұрының көлік құралын өз ауласына кіргізуіне кедергі болмаған.
“Полиция қызметкерлері ұрланған мүлікті тәркілеп, заңды иесіне қайтарды. Қазіргі таңда Әл-Фараби аудандық полиция басқармасының тергеушілері істі айыптау актісімен бірге сотқа жолдады” деп хабарлады полициядан.
