Түркістан облысындағы «Сайрам-Өгем» ұлттық паркінің Өгем филиалына қарасты Келес орманшылығында өрт шықты.
Бұл туралы облыстық Төтенше жағдайлар департаментінің Дағдарыс орталығына 13 шілде күні сағат 01:30-да хабарлама келіп түскен.
Ведомство мәліметінше, тез арада жедел штаб құрылған. Оның құрамына орман шаруашылығы, жергілікті атқарушы органдар мен Түркістан облысы ТЖД қызметкерлері кірді.
Жедел қабылданған шаралар аясында жұмылдырылған күштер мен құралдарды ескере отырып, құрғақ шөп пен бұталар өрті сағат 05.50-де оқшауланып, сағат 08.00-де сөндірілді. Өрттің ауданы 2 гектарды құрайды. Қайтыс болғандар мен зардап шеккендер жоқ.
Өртті сөндіруге орман шаруашылығынан 48 адам мен 8 техника, Түркістан облысы ТЖД 45 адам мен 5 техника жұмылдырылды.
