«Best Fest Nauryz» атауымен өткен шараға 5500-ден астам адам тіркеліп, қазақ халқының мәдени мұрасын әлемдік деңгейде насихаттаған.
Олар, «Қазақ ұлттық киіміндегі ең көп адам» номинациясы бойынша Гиннес рекордын орнатты.
Мерекеге Ұлыбританиядан арнайы келген Гиннесс рекордтар кітабының ресми өкілдері есеп жүргізіп, облыс әкіміне сертификат табыс етті.
«Ұлыстың ұлы күнінде тарихи сәттің куәсі болып отырмыз. Қазақ халқының терең тарихы мен бай мәдени мұрасын, ұлттық дәстүрімізді жер жаһанға паш еттік. Маңғаз Маңғыстауымызда қазақтың ұлттық киімінен әлемдік рекорд орнады. Осынау зор жетістікпенен барша отандастарымызды құттықтаймын! Қазақ халқының мәдениетін насихаттауға атсалысқан бастамашы топқа, Лондон қаласынан арнайы келген Гиннесс рекордтар кітабының өкілдеріне және рекорд орнатуға үлес қосқан барша қатысушыларға алғысымды білдіремін!»,-деді облыс әкімі.
Айта кетейік, наурыз мерекесіне орай, Ақтауда теңіз жағалауында 30 киіз үй тігіліп, қолөнер шеберлерінің жәрмеңкесі ұйымдастырылды. Сондай-ақ, ұлттық спорттық ойындардан сайыс өткізілді.
