Еліміздің азаматтары Украинаға соғысқа жіберіліп жатыр. Осы алып қашпа әңгімелерге министрлік нүкте қойды. Сыртқы істер министрлігінің ресми өкілі Айбек Смадияров бұл ақпаратты жоққа шығарды.
“Ресей Федерациясында тергеуде жатқан біздің азаматтардың Украинадағы соғыс қимылдарына әкетіліп жатқаны туралы сұрақ қойылды. Мен оны тағы да жоққа шығарғым келеді. Өткен брифингте де бұл туралы айттым, біздің бірде-бір азамат өз еркінен тыс соғыс қимылдарына қатысқан жоқ және қатыспайды. Бірнеше азаматтарымыздың әлеуметтік желілер арқылы, атап айтқанда, Telegram арналары арқылы есірткі тасымалдау бойынша жұмыс тапқаны туралы фактілер тіркелді. Біз бұл азаматтардың туыстарымен байланыстамыз, бірақ атап өткім келеді, бірнеше журналист бұл тақырыпты арнайы алға тартып, өздеріне не хайп, не атақ-даңқ жинауға тырысып жатыр, қандай да бір себептермен осы 5-6 адам ақпаратта 50-60 адамға айналды. Сондықтан бұл ақпараттың шындыққа жанаспайтынын толық жауапкершілікпен мәлімдеймін. Осы 5-6 фактінің барлығы біздің бақылауымызда”, – деді Айбек Смадияров.
Қазіргі таңда, күдіктілер ұсталып, тергеу амалдары жүргізілуде.
