Шымкент қаласының қылмыстық істер жөніндегі мамандандырылған ауданаралық сотында аса ірі мөлшердегі психотроптық заттарды заңсыз иемденіп, сақтап, таратпақ болған азаматқа үкім шықты.
2024 жылдың желтоқсан айында сотталушы Telegram мессенджері арқылы белгісіз тұлғамен байланысып, психотропты заттарды алып, оларды жасырын орындарға орналастырып отырған. Әр “жасырылым” үшін 1800 теңге сыйақы алуы тиіс болған.
Ол «Нұртас» шағынауданынан а-PVP психотропты заты салынған 30 ораманы алып, «Қайтпас-1» шағынауданына жасырған сәтінде полиция қызметкерлері тарапынан ұсталды. Заттың жалпы салмағы – 15,97 грамм.
Сотталушы кінәсін мойындап, төменгі жаза тағайындауды сұраған. Сот оны ҚК 297-бабы 3-бөлігінің 1), 3) тармақтары бойынша кінәлі деп танып, 7 жылға бас бостандығынан айырды. Үкім заңды күшіне енді.
