Алғаш рет, Шымкенттен Жиддаға тікелей рейс ұшты. Бұл туралы Air Astana әуе компаниясының баспасөз қызметі хабарлады. Ағымдағы жылдың 31 қазанына дейін аптасына 2 рейс жүзеге асырылады деген жоспар бар. Ал, 31 қазаннан бастап Шымкент-Жидда бағытындағы бір жиілігі жаңа Шымкент-Медина бағытына ауыстырылады.
«Airbus A320 заманауи әуе кемесімен Шымкент-Жидда және Шымкент-Медина рейстерінің ұшу ұзақтығы -5 сағат 35мин. Шымкент-Жидда бағыты бойынша екі жаққа да авиабилеттердің ең төменгі құны 301 208 теңгеден басталады. Ал, Шымкент-Медина бағыты бойынша 308 050 теңгеден. Қазақстан азаматтары Сауд Арабиясына сапар алдында электрондық виза (https://visa.visitsaudi.com/)алуы қажет»,- делінген хабарламада.
Жидда – Сауд Арабиясындағы көлемі жағынан екінші қала және оның «экономикалық астанасы». Жидда көрікті жерлерге, соның ішінде король Факх субұрқағына, ескі Әл-Балад қаласына, қызықты базарлар мен Қызыл теңіз жағажайларына бай. Жидда Меке қаласынан жүрдек пойызбен бір сағат қашықтықта орналасқан.
Мәдина – мұсылмандардың Меккеден кейінгі екінші қасиетті қаласы. Пайғамбар мешіті ислам дінінің Меккедегі әл-Харам мешітінен кейінгі екінші киелі орны болып саналады. Қалада басқа да көптеген мешіттер, мұражайлар, сауда орталықтары мен мейрамханалар бар.
