Қаржы мониторингі агенттігінің Шығыс Қазақстан облысы бойынша департаменті Бас көлік прокуратурасының үйлестіруімен «Өскемен әуежайы» АҚ лауазымды тұлғаларына қатысты қылмыстық істі тергеуді аяқтады.
Тергеу барысында акционерлік қоғамның бұрынғы президенті мен өзге де қызметкерлері бес жыл бойы жүйелі түрде қызметтік өкілеттіктерін асыра пайдаланып, аса ірі көлемде сеніп тапсырылған мүлікті иемденіп, заңсыз табыс көздерін жасыру әрекеттерін жүзеге асырғаны анықталды.
Атап айтқанда, олар еңбекақыны негізсіз өсіру, жалған сыйақылар мен шарттар жасау арқылы ақша қаражатын жымқырған. Бұл қаражат кейін касса арқылы қолма-қол ақшаға айналдырылған.
Сонымен қатар, қоғамға тиесілі көлік құралдары бухгалтерлік есептен негізсіз шығарылып, олардың нарықтық құнынан бірнеше есе төмен бағада сенімді тұлғаларға сатылған.
Тексеру нәтижесінде коммерциялық нысандардың да төмендетілген жалдау ақысы және шындыққа сәйкес келмейтін жалға берілетін аумақ көлемі арқылы заңсыз жалға берілгені анықталды.
Аталған заңбұзушылықтар салдарынан мемлекетке келтірілген жалпы шығын көлемі 157 миллион теңгені құрады.
Сот санкциясымен күдіктілердің 126 миллион теңге тұратын мүлкіне (оның ішінде 4 пәтер, жер учаскесі және 2 автокөлік) тыйым салынды. Күдіктілер қамауға алынды, тергеу материалдары сотқа жолданады.
