Шымкентте түркістандық ер адам 1 тоннаға жуық темірді қолды еткен.
Полицияға жергілікті тұрғын хабарласып, үйінің ауласынан құрылысқа қажетті 1 тоннаға жуық темір-терсек ұрланғанын айтып арызданған. Аталған жайт Қылмыстық кодекстің 188-бабы 3-бөлігі 3-тармағы “Үй-жайға заңсыз кіру арқылы жасалған ұрлық” бойынша тіркелді.
Жедел- іздестіру жұмыстары барысында полицейлер жақын маңдағы бейнекамераларды тексеріп, ықтимал куәгерлерден жауап алған. Нәтижесінде оқиға болған уақытта осы маңнан өткен күдікті жүк көлігі көзге түскен. Жүргізуші ер адам өз жауабында жүк тасымалдау қызметін көрсететін такси жүргізушісі екенін, соңғы рет бұл маңнан клиенттің шақыртуымен темір-терсек әкетіп, оны арнайы қабылдайтын орынға жеткізіп бергенін көрсеткен. Ал темір қабылдаумен айналысатын кәсіпкер қылмыс болған күні бейтаныс біреуден 1 тоннаға жуық темірді сатып алғанын жеткізген.
“Полицейлер көрсетілген бағыттамалар бойынша күдіктінің жеке басын анықтап, оны қала аумағында құрықтады. 34 жастағы түркістандық тергеу барысында өз кінәсін толық мойындап, жасаған ісіне өкінетінін айтты. Жинақталған іс-құжаттар, айғақтармен сотқа жолданды” деп хабарлады полициядан.
Сот айыпталушыға 4 жыл мерзімге бас бостандығын шектеу жазасын тағайындады. Жәбірленушіге келтірілген материалдық шығынды толық өтеу міндеттелді.
