Енді легионерлерге бюджеттен ақша берілмейтін болды. Бұл туралы Нартай Аралбайұлы хабарлады. Оның айтуынша, тиісті заңдық норманы үкімет қолдаған. Адам естімеген спорт түрлеріне ақша беріп келген министрліктің шешімі де тоқтатылды. Сондай-ақ, еліміздегі 180 спорт түрі қысқартылады.
«Спорттағы қаражаттар, жоғары жетістіктегі спортына беріледі. Оның ішінде басым спорт түрлеріне беріледі. Яғни, депутаттық сауалымда айтылғандай, 180 спорт түріне, бәріне мемлекеттің ақшасы берілмейтін болады. Ақша алатын спорт түрлері, Олимпиадалық, Азияда, Паралимпиада сынды спорт түрлері ғана қаражатты алады. Одан бөлек, мемлекеттік ұйымдар және бұқаралық спорт түрлеріне беріледі»,-деді депутат.
Естеріңізге сала кетейік, бұған дейін Президент Қасым-Жомарт Тоқаев, өз жолдауында легионерлерге қатысты пікір білдірген болатын. Яғни, мемлекет басшысы, шетелдік спортшыларға азаматтық беріп, ел атынан додаға қосу тәжірибесін доғару керек екенін айтты.
«Өйткені кез келген легионер ұлттық құрамаға шақырту алғысы келетін жас әрі болашағынан көп үміт күттіретін атлеттеріміздің жолын кеседі. Одан гөрі қазір бізде дамуы кенжелеп тұрған спорт түрлерінен мықты шетелдік бапкерлерді тарту мүмкіндігін қарастырған жөн. Легионер-спортшылардың жетістігі бүгін мерейіңді өсіргенмен, ертең абыройыңды асқақтатпайды. Бұл жерде кәсіби бапкерге басымдық берген жөн»,– деді Мемлекет басшысы.
