Елордалық физика-математика бағытындағы Назарбаев зияткерлік мектебінде 29-30 маусым аралығында Нұр-Сұлтан қаласында өткен робототехникадан 2022 жылғы World Robot Olympiad республикалық чемпионаттың қорытындысы шығарылды.
«Менің роботым – менің досым» деп аталатын республикалық олимпиадада жас роботшылар Future Engineers, Robomission, Future Innovators және Robosports т номинациялары бойынша сынға түсті.
Облыстық жарыстардың қорытындысы бойынша республикалық чемпионатта Шымкент қаласының атынан үш тілде білім беретін №2 мамандандырылған мектеп-интернатының оқушылары – 9 «Б» сынып оқушысы Олжас Тойлыбаев пен 8 сынып «А» оқушысы Әмина Қаныбек қатысты. Жас зиялылар World Robot Olympiad аясында өткен Республикалық робототехника чемпионатында 1-орын жүлдегері атанды. Олар Robosport санатында сынға түсті.
WRO-2022 жеңімпаздарын Назарбаев Зияткерлік мектептері Басқарма төрағасының орынбасары Светлана Испусинова, басқарушы директор Айгүл Қазжанова, НЗМ ақпараттық технологиялар және қызмет көрсету орталығы директорының орынбасары Азамат Биданов және физика-математика бағытындағы астаналық Назарбаев зияткерлік мектебінің директоры Мейрам Жәкенов марапаттады.
Олжас Тойлыбаев пен Әмина Қаныбек оқу-жаттығу жиындарының Жазғы мектебіне қатысып, 2022 жылдың 17-19 қарашасында Германияның Дортмунд қаласында өтетін WRO-2022 Олимпиадасының халықаралық кезеңіне дайындықты бастайды.
