Ақмола облысындағы Жібек жолы кентінің маңында Toyota Land Cruiser-200 автокөлігіне оқ атқан күдікті ұсталды. Аршалы аудандық полиция бөліміне елорданың 19 жастағы тұрғыны арызданған. Ол арызында өзіне тиесілі автокөлігіне зақым келтірілгені туралы көрсеткен.
Оқиға орнына дереу жеткен жедел-тергеу тобы Астана – Қарағанды тас жолында белгісіз адамдар арасында жанжал туындағанын анықтаған. Куәгерлердің айтуынша, қаскөйлердің бірі мылтықты алып, бірнеше рет оқ атқан. Polisia.kz жазуынша, оқиға орнынан полиция атылған гильзалар, газ баллонын тәркіленді. Сараптама тағайындалды.
Жүргізілген тергеу және жедел-іздестіру іс-шараларының нәтижесінде күдікті анықталды. Ол Астана қаласының тұрғыны болып шықты, жасы 39-да.
Тінту іс-шаралары барысында күдіктіден заттай дәлелдер, атап айтқанда Наган тапаншасы және 57 оқ тәркіленді. Полицейлер Қылмыстық кодекстің 293-бабының 3-бөлігі “Бұзақылық” бойынша сотқа дейінгі тергеуді бастады. Ұсталған ер кісі уақытша ұстау изоляторына қамалды.
Күдікті бұған дейін Қылмыстық кодекстің 293-бабы бойынша қылмыстық жауапкершілікке тартылған екен.
