Бұған Ресей үкіметінің бидайды елден шығаруға тыйым салғаны себеп. Вагондарға тиелген 2 мың 450 тонна астық екі аптадан бері Орск темір жол бекетінде тұр.
Ақтөбедегі ең ірі нан зауыттарының бірі — «Рамазан» ЖШС-інің директоры Тимур Шаймағамбетов мәселені шешіп беруді сұрап, «Атамекен» өңірлік кәсіпкерлер палатасына жүгінді. Кәсіпкердің айтуынша, бидайды жеткізуші компаниямен арадағы келісім-шарт қаулы шыққанға дейін жасалған. Жүк вагондары 14-наурызда Ақтөбеге аттануы тиіс болған. Дәл сол күні Ресей үкіметінің бидайды сыртқа шығармау туралы қаулысы шығып, вагондар жарты жолда тұрып қалды.
Нан пісіруден бөлек кәсіпорында ұн және ұн өнімдері өндіріледі. Ресейден жеткізілетін бидай «Рамазанның» айлық қажеттілігінің 30 пайызын жауып тұрған.
Кәсіпорын басшысы «әзірше ішкі қорды тұтына тұрамыз. Оның өзі сәуірдің ортасына дейін ғана жетеді дейді.
«Атамекен» өңірлік кәсіпкерлер палатасындағылар жағдайға екі елдің үкіметі араласпаса, проблеманы аймақтық деңгейде шешуге қауқарсызбыз дегенді жеткізді. Дегенмен, бұл мәселені ресейлік әріптестерімен талқыланған. Орынбор облысының бизнес-омбудсмені Виктор Коршуновқа жағдайды реттеуге ықпал етуді сұрап, 25-наурызда хат жолдаған. Ресейлік тарап әзірге жауап берген жоқ.
